
پشاور ہائیکورٹ کا عالیہ حمزہ کو کسی مقدمے میں گرفتار نہ کرنے کا حکم
پشاور:ہائیکورٹ نے پی ٹی آئی رہنما عالیہ حمزہ کو کسی بھی درج مقدمے میں گرفتار نہ کرنے کا حکم جاری کرتے ہوئے ضمانت میں توسیع کردی۔ پشاور ہائیکورٹ میں پی ٹی آئی رہنما عالیہ حمزہ کی مقدمات کی تفصیل کے لیے دائر درخواست پر جسٹس ارشد علی اور جسٹس وقار احمد پر مشتمل دو رکنی بینچ نے سماعت کی۔ وکیل درخواست گزار نے کہا کہ درخواست گزار کو جن درج مقدمات کا علم ہے اس میں عدالتوں میں پیش ہو رہی ہیں، عالیہ حمزہ ملک کا کہنا تھا کہ میرے خلاف پنجاب اور بلوچستان میں بے شمار مقدمات درج کیے گئے ہیں،میں پنجاب کی ہر اے ٹی سی کورٹ میں پیش ہو رہی ہوں،میں نے 15 ماہ جیل میں بھی گزارے ہیں، میرے خلاف ایسے کیسز بنائے گئے جن کا مجھے علم نہیں ہے۔ جسٹس ارشد علی نے رہمارکس دیتے ہوئے کہا کہ ہم وفاق کی حد تک تفصیلات طلب کرسکتے ہیں، صوبوں کی تفصیلات کے لیے آپ متعلقہ عدالتوں سے رجوع کریں۔ عدالت نے عالیہ حمزہ کو مقدمات تفصیل کے لیے متعلقہ عدالت سے رجوع کرنے کی ہدایت کرتے ہوئے ان کی حفاظتی ضمانت میں 14 جنوری تک توسیع کردی۔ عدالت نے پی ٹی آئی رہنما کو کسی بھی درج مقدمے میں گرفتار نہ کرنے کا حکم بھی جاری کیا۔