Official Website

اسلام آباد ہائی کورٹ کا وزیر داخلہ کو پی ٹی آئی کے ساتھ مذاکرات کا حکم

4

چیف جسٹس اسلام آباد ہائیکورٹ نے وزیر داخلہ کو پی ٹی آئی کے ساتھ پُرامن اور آئین کے مطابق احتجاج کے لیے مذاکرات کا حکم دے دیا۔ پی ٹی آئی احتجاج روکنے کی درخواست پر سماعت کے بعد اسلام آباد ہائی کورٹ کے چیف جسٹس عامر فاروق نے حکم نامہ جاری کردیا جو کہ 5 صفحات پر مشتمل ہے۔عدالت نے وزیر داخلہ محسن نقوی کو پی ٹی آئی سے مذاکرات کا حکم دےدیا اور کہا کہ مناسب ہوگا کہ مذاکرات کے لیے کمیٹی تشکیل دی جائے، وزیرداخلہ یا پھر کسی اور کو کمیٹی کا سربراہ بنا کر پی ٹی آئی کی لیڈر شپ کو انگیج کیا جائے۔اسلام آباد ہائی کورٹ نے کہا کہ کمیٹی پی ٹی آئی قیادت کو بیلاروس کے صدر کے دورے کی حساسیت سے آگاہ کرے، کمیٹی میں چیف کمشنر اسلام آباد کو بھی شامل کیا جائے، عدالت کو یقین ہے کہ جب یہ رابطہ ہو گا تو کچھ نہ کچھ پیش رفت ہوگی۔عدالت نے مزید کہا کہ اگر مذاکرات کامیاب نہ ہوں تو وزیر داخلہ قانون کے مطابق اسلام آباد میں امن و امان کا یقینی بنائیں۔تحریری حکم نامہ میں کہا گیا کہ پی ٹی آئی اسلام آباد میں احتجاج کے لیے ڈپٹی کمشنر کو سات روز پہلے درخواست دے، اجازت ملنے پر احتجاج کیا جاسکتا ہے، وزیر داخلہ یہ پیغام پی ٹی آئی لیڈرشپ تک پہنچائیں۔عدالت نے فریقین کو 27 نومبر تک رپورٹ جمع کروانے کا حکم دیا، کیس کی مزید سماعت 27 نومبر کو ہوگی۔