عوام کی ترقی پر سیاست نہیں ہونی چاہئے‘ وزیر اعظم شہباز شریف

اسلام آباد (ساجد نذیر سے)وزیر اعظم شہباز شریف نے کہا ہے کہ نام نہاد منصف نے سازش کرکے پاکستان کڈنی اینڈ لیور انسٹی ٹیوٹ (پی کے ایل آئی) کو تباہ کرنے کی کوشش کی، عوام کی ترقی کے معاملے پر سیاست نہیں ہونی چاہیے،اسلام آباد میں جناح میڈیکل سینیٹر کا سنگ بنیاد رکھا ہے،منصوبہ صرف اسلام آباد اور راولپنڈی کیلئے نہیں،جناح میڈیکل سینٹرکی سہولیات سے دیگرعلاقوں کے لوگ بھی مستفیدہوں گے، بجلی کا بحران تھا تو جذبات میں کہہ گیا 6 ماہ میں لوڈشیڈنگ کا خاتمہ ہوگا، میرا بہت مذاق اڑیا گیا، عزت رکھنے والا ہے تو پھر آپ نے دیکھا ملک بھر میں جاری 20، 20 گھنٹے کی لوڈشیڈنگ ختم ہوگئی۔ اتوار کو جناح میڈیکل کمپلیکس کا سنگ بنیاد رکھنے کی تقریب سے خطاب کرتے ہوئے انہوں نے کہا کہ یہ منصوبہ نوازشریف کی قیادت اور مخلوط حکومت کا جڑواں شہروں کے لئے ہی نہیں بلکہ کے پی،کشمیر،گلگت بلتستان کے مریضوں کے لئے بھی تحفہ ہوگا۔یہاں نرسنگ سکولز اور جدید لیب بنیں گی۔انہوں نے کہا کہ اس جدید ہسپتال میں پیچیدہ ترین امراض کا علاج ہوگا۔انہوں نے کہاکہ آغا خان فاؤنڈیشن نے اس سنٹر کی تمام کنسلٹنسی بلامعاوضہ دی ہے جس پران کے مشکور ہیں۔وزیر اعظم نے کہا کہ پرنس کریم آغا خان نے کئی دہائیوں سے صحت کے شعبہ اور پاکستان کی تعمیر میں نمایاں کردار ادا کیاہے۔انہوں نے کہا کہ اس کمپلیکس کے لئے 600 کنال اراضی مختص کی گئی ہے جبکہ 200 کنال کا کمرشل سنٹر بھی اس ہسپتال کے نام کیا ہے، اس کی آمدن اس ہسپتال کے بننے والے ٹرسٹ میں جائے گی۔انہوں نے کہا کہ یہ وہی ماڈل ہے جس کا نوازشریف نے اجراء کیاتھا کہ عام پاکستانی کے لئے علاج مفت ہو۔انہوں نے کہا کہ تعلیم اور صحت کی سہولیات کی فراہمی ہر پاکستانی کا حق ہے۔انہوں نے کہا کہ پی کے ایل آئی نہ صرف پاکستان بلکہ جنوبی ایشیاء کا بہترین ہسپتال ہے تاہم ایک سازش کرکے اس منصوبے کو تباہ کرنے کی کوشش کی گئی۔انہوں نے کہاکہ پی کے ایل آئی ہسپتال کے بورڈ میں قابل ترین لوگ شامل تھے،وہ ختم کیاگیا،اس کو ٹرسٹ سے ہٹاکر محکمہ صحت کے حوالے کیاگیا،کووڈ کے دوران اس کی سہولیات سے بہت فائدہ اٹھایاگیا اور یہ ایک مرکز بناہوا تھااس سے قبل مریض لاکھوں روپے خرچ کرکے بیرون ملک علاج کے لئے جاتے تھے،اس ہسپتال میں ہزاروں مریضوں کا مفت ٹرانسپلانٹ کیاگیا۔انہوں نے کہا کہ جناح میڈیکل کمپلیکس میں مستحق مریضوں کو سو فیصد مفت علاج کی سہولیات مہیا کی جائیں گی تاہم صاحب حیثیت لوگوں کو علاج پر اٹھنے والے اخراجات برداشت کرنا پڑیں گے۔وزیر اعظم نے کہا کہ جناح میڈیکل کمپلیکس میں تمام جدید سہولیات ہوں گی،یہاں میڈیکل سکول قائم کیاجائیگا،یہ سنٹر صوبوں سے مزید ہم آہنگی اور رابطہ کا ذریعہ ہوگا،یہاں ایمرجنسی میں ائیر ایمبولنس دستیاب ہوگی،اس منصوبے کے لئے جتنے بھی فنڈز درکار ہوں گے وہ مہیا کئے جائیں گے۔انہوں نے کہا کہ اس منصوبے کی ایک سال میں تکمیل کی ہدایت کی ہے،یہاں 24 گھنٹے کام ہوگا۔اسی طرح آئی ٹی پارک بھی اس سال کے آخر تک مکمل کرنے کی ہدایت کی۔ وزیر اعظم نے کہا کہ چیئرمین سی ڈی اے علی رندھاوا نے اس منصوبے کیلئے فوری اراضی فراہم کی ہے ان کے مشکور ہیں،ہسپتال میں امیر وغریب کو یکساں صحت کی سہولیات میسر آسکیں گی۔انہوں نے کہا کہ چیئرمین سی ڈی اے کو ہدایت کی کہ اس مرکز کے متاثرین کو ون ونڈو کے تحت سہولیات دیں،ان کو ان کی اراضی کی مارکیٹ پرائس دیں گے۔وزیر اعظم نے کہا کہ ایک سال میں اس منصوبہ کی تکمیل کا مشن مشکل ضرور ہے تاہم ناممکن نہیں،اس خواب کی تعبیر مل کرکریں گے۔ہیلتھ کوآرڈینیٹر ڈاکٹر مختار احمد نے کہا کہ جناح میڈیکل کمپلیکس کا پہلا مرحلہ دو ماہ میں مکمل کرلیاگیا ہے،یہ کمپلیکس کثیرالمنزلہ ہوگااس کا دوسرا مرحلہ بھی دوماہ میں مکمل کریں گے اس کمپلیکس میں جدید سہولیات میسر ہوں گی۔رکن قومی اسمبلی ڈاکٹر طارق فضل چوہدری نے کہا کہ ریکارڈ مدت میں اس کمپلیکس کا سنگ بنیاد رکھا جارہا ہے۔اس کی تعمیر سے صحت کی مزید سہولیات میسر ہوں گی۔اسلام آباد میں اہم منصوبے ہمارے ادوار میں مکمل ہوئے ہیں۔یہ کمپلیکس ایک اہم سنگ میل ہے۔رکن قومی اسمبلی حنیف عباسی نے کہا کہ پنجاب بھر میں شہباز شریف نے نئے ہسپتال بنائے،اس سے سب سے زیادہ کے پی کے لوگ مستفید ہوں گے۔انسانیت کی فلاح کا کام کرنے والے لوگ ہمیشہ زندہ رہتے ہیں۔اسلام آباد میں 160 الیکٹرک بسیں چل رہی ہیں،روڈ انفراسٹرکچر بنے ہیں۔رکن اسمبلی راجہ خرم نواز نے کہا کہ اسلام آباد کے لوگوں سے کئے گئے وعدہ کو وزیر اعظم نے پورا کیاہے۔متاثرین کی زمینوں کے معاملات حل کرنے کے لئے ون ونڈو کی سہولت دینے کا حکم وزیر اعظم نے دیا ہے۔